رحلة الى الاسكندرية ب160 جنيه

النهارده هنتكلم عن رحلة لمدينه الاسكندريه

الي مينفعش الواحد يزهق منها حتي لو كررها ١٠٠٠ مره بنفس البرنامج

عشان كده كل فتره هعمل برنامج جديد نقدر بيه نلف الاسكندريه و نتمتع بيها.


 لو انت عايز تستمتع بالاسكندريه و مش عايز تشيل هم السواقه و الركنه و الزحمه

فبلاش تطلع بالعربيه و استمتع بالقطار و التمشيه علي قد ما تقدر.


 كل حاجه في الرحله ديه متصوره بالاسعار عشان الناس الي مش بتصدق ان الاسعار ديه موجوده

دلوقتي بعد غلو كل الاسعار حولينا

و لازم اكد ان الرحله تناسب العائلات و الناس الي بتحب التصوير جدا 
 

تفاصيل رحله الاسكندريه يوم ٢٤/٣/٢٠١٧
 

الاسكندرية | دليل المقطم

القطار
يفضل تحجز قبلها بيومين عشان تلاقي حجز علي قطار الدرجه التانيه بتاع الساعه ٨:١٥٥ صباحا

و ده ميعاد ثابت يوميا و قطار نظيف جدا سعر التذكره ٣٠ جنيه

و بياخد حوالي ٣ ساعات عشان بيقف في محافظات و ده بيوصل محطه الاسكندريه علي الساعه ١١:١٥ تقريبا.

القطار الي بعده مباشر الاسكندريه بيتحرك الساعه ٩ صباحه و سعر التذكره درجه تانيه ٤٥ جنيه و بيوصل علي ١١:٣٠

 ناخد بالنا و احنا راكبين ان كل القطارات بتقف في محطه سيدي جابر فالناس بتتلغبط و تنزل فيها بدل محطه مصر بتاعه الاسكندريه.

احجزوا التذكره رايح جاي من القاهره عشان تامن نفسك خصوصا لو بنات.

 

مواعيد القطار | دليل المقطم

سعر تذكرة القطار | دليل المقطم


انا حاطت في الصور مواعيد العوده من الاسكندريه و بالاسعار

انا حجزت عوده ٩:٣٠ مساءا و ده خط محافظات بيقف في طنطا و دمنهور و بيوصل القاهره في ٣ ساعات 

سعر التذكره درجه تانيه ٣٠ جنيه بس هتحس ان مستواه اقل شويه بس بيقوم بالواجب و مكيف 

خدوا بالكم ان مكاتب الحجز بتاعت القطارات الي بتكون موجوده في السنترالات اغلي ٣,٥٠ و علي النت اغلي ١,٥٠.

 

مسار الرحله

اول ما بتخرج من محطه قطار مصر في الاسكندريه

محطة مصر | دليل المقطم

امشي يمين ٥٥ دقائق هتوصل لمنطقه اسمه كوم الدكه

كوم الدكة | دليل المقطم

 

و كده انت وصلت لاول مزار و هو المسرح الروماني و ده سعر التذكره ١٠ جنيه

هتدخل تتفرج علي المسرح و تتصور هناك و غالبا هتقد ٤٥ الي ٦٠ دقيقه داخل المكان.

 

المسرح الرومانى | دليل المقطم

 

المسرح الرومانى | دليل المقطم

هتخرج من المسرح و تمشي ناحيه اليمين ٥٥ دقائق هتوصل لسوق الشعبي و عن السنترال في المنطقه 

 

و من هناك اطلع علي شارع اسمه عبد المنعم و اسال عن مطعم اسمه البغدادي

و ده مطعم شعبي بتاع فول و طعميه و اطلب سندوتشين طعميه اسكندراني و سعر الساندوتش ١.٧٥ جنيه

و هتدوق طعميه مختلفه تماما عن بتاعت القاهره.

اخرج و اسال عن طريق كوم الشقافه عشان توصل لتاني مزار و هو عمود السواري.

عمود السوارى | دليل المقطم
 نصيحه لو انت طالع يوم جمعه اتمشي احسن من المطعم لعمود السواري

و بلاش تركب الترام عشان الطريق ده بيكون زحمه عشان السوق

و طريق المقابر فهتلاقي الترام بيقف كتير جدا و تضيع وقت بالرغم من قرب المسافه.

هتتمشي حوالي ٢٥ دقيقه الي ٣٥ دقيقه و هتنبسط وسط السوق اوي و هتحس عامل زي سوق الجمعه و السيده عيشه.

هتلاقي حيوانات و طيور واسماك زينه حيه لبيع فهتصور كتير طول ما انت ماشي.

هتوصل لعامود السواري و هتقعد حوالي من ٤٥ الي ٦٠ دقيقه.

عمود السوارى | دليل المقطم
 تخرج تمشي شمال هتلاقي مشروع واقف (ميكروباص) تقوله عايز تنزل المنشيه

عند قبر الجندي المجهول و ده هيكون اخر خط المشروع.


الاكل
تنزل اخر الخط و تسال علي مطعم شعبان بتاع السمك

عمود السوارى | دليل المقطم

مكانه بالظبط:

في المنشيه بعد محطة الرمل قدام فرع البنك الاهلي المصري علي الناحيه التانيه في قهوه هو وراها علي طول.

و ده محل اسماك شعبي فهتلاقي اسعاره رخيصه جدا

_كام ملحوظه عشان متضيعش وقت هناك

مشكله شعبان انك ممكن تستني وقت عشان تعرف تقعد هناك

فانت اول ما توصل هناك متقفش عند بتاع الكاشير عشان انت بتحاسب بعد الاكل.

ادخل علي المكان الي بتختار منه السمك

انا اخترت سمكه بوري تتعمل سنجاري وزنها ٥٥٠ جرام و ده حجم مناسب جدا

و معاه ربع جمبري مقلي (سعر الكيلو ١٦٠ جنيه)

عمود السوارى | دليل المقطم

هو المحل معندوش غير نوعين جمبري مسلوق و مقلي بس عشان محدش يسال علي بترفلاي او غيره.


 بيديك فاتوره عليها رقم من فوق تاخدها و هتلاقي ناس تبع المحل مسؤوله عن انها تقعدك

و هتلاقي راجل مليان اسمه شعبان قله عايز تقعد و هو هيقولك قصادك قد ايه

نصيحه لو زحمه شويه اطلع اتمشي علي الكونيش و تعاله بعد نصف ساعه طبعا احتفظ بالفاتوره.

ارجعلوا بعد شويه

اول ما تقعد هينزل اطباق سلاطات و عيش و دول ببلاش

هتلاقي راجل شايل صنيه عليها اطباق ارز صياديه لو عايز هينزلك علي الفاتوره ٥ جنيه سعر الطبق.

اكلة سمك | دليل المقطم
في واحد بيكون شايل كوبيات شوربه جمبري و ديه ببلاش .

بلاش تطلب شوربه سي فود عشان خفيفه جدا و مش هتعجبك لو اكيل سمك

سعر الطبق ٢٥ جنيه.

بلاش تطمع و تطلب اكل كتير عشان هتسيب كتير و لسه هتروح تاكل حلو.

خد بالك الجمبري سواء مقلي او مسلوق بيتعمل في الاسكندريه بقشره.

حساب السمكه مع الجمبري و السلاطات و العيش و شوربه الجمبري ٦٠ جنيه فقط 

سمك | دليل المقطم 

تخلص اطلع اتمشي في شارع سعد زغلول و لو مشمتش ريحه البن الي طالع من كافيه البن البرازيلي

يبقي كده انت ماشي غلط ادخل هناك و اطلب اي مشروب بتحبه و متوسط الاسعار ١٦ جنيه

الشرب ده اختياري عشان في ناس بعد الاكل مش هتقدر تشرب. فال ١٨ جنيه اختياريه.

انا طلبت ايس موكا كبير كان ب ١٨ جنيه.

البن البرازيلى | دليل المقطم
تخرج تطلع علي الكورنيش و لو لسه عندك علي الاقل ساعتين و نص اركب اتوبيس ب ١١ جنيه

و قله بحري عند الشيخ وفيق

هتنزل اقرب مكان و تتمشي ١٠ دقائق و اطلب الحاجه تيك اوي بلاش تقعد عشان الزحمه و الوقت.

انا طلبت رز باللبن و المكسرات و كان ب ١٣ جنيه.

البن البرازيلى | دليل المقطم
 

زي ما قلت لو عندك وقت علي الاقل ساعتين و نص خد الحاجه و اركب مشروع عكس الاتجاه

الي نزلت فيه و قله عايز تنزل عند مسجد المرسي ابو العباس و هتدفع جنيه


 اقعد استمتع بالبحر و اضاءه القلعه بليل و انت بتاكل و اركب من هناك لمحطه مصر

و خد بالك يفضل لو هتركب من القلعه لمحطه اركب قبلها ب ساعه عشان المشروع بياخد طريق الكونيش

فممكن ياخد وقت عشان الزحمه و هينزلك مكان تتمشي ١٠ دقائق و هتدفع ٢ جنيه.


لو خلاص ناقص وقت ٤٥ دقيقه خد الحاجه و اركب مشروع بينزلك محطه مصر و هتدفع ١.٢٥ جنيه

و ده بيمشي من طريق داخلي فهتوصل اسرع.

 

 

و بكده لو حسبت تكلفه الرحله

قطار رايح جاي ٦٠ جنيه

اكل ٣.٥٠ +٦٠ +١٣= ٧٦.٥٠ جنيه 

مزارات: ٢٠ جنيه

تكلفه الرحله:

١٥٦.٥٠ و زود ٣ جنيه اجمالي المواصلات يبقي وقفت الرحله ١٥٩.٧٥٥ جنيه لو هتضيف المشروب يبقي ١٧٧.٧٥ جنيه.

كده انت عملت رحله متكامله و غيرت جو و انبسطت 

اتمني الكل يجرب البرنامج ده و يقولي رايه فيه.

ان شاء الله هعمل برامج تانيه و اقتصاديه برده 

مشاركتك بالتعليق تعنى أنك قرأت بروتوكول نشر التعليقات على دليل المقطم، وأنك تتحمل المسئولية الأدبية والقانونية عن نشر هذا التعليق

بروتوكول نشر التعليقات من دليل المقطم