اجازة فى الجونة !!

كل واحد مننا له مقياس مختلف في تقييم أجازته، فيه اللى بيقيسها باللمة والأصحاب، واللى بيقيسها بالأكل الحلو، وغيره بيحسبها من ناحية الفلوس، لكن تقييمنا الشخصي لأي سفرية أو مكان جديد بنروحه هو شعورنا بالارتباط به، بنحس أننا مش عاوزين نرجع، وممكن توصل لدرجة أننا نفسنا نعيش فيه العمر كله، وده اللى حصل معانا في رحلتنا للجونة.

الجونة منتجع سياحي في خليج أبو تيج في مدينة الغردقة على ساحل البحر الأحمر، افتتح سنة 1990، لكنه أصبح من كام سنة فاتت وجهة للمتزوجين حديثًا أو اللى بيدوروا على الاسترخاء وتقضية أجازة ما تتنسيش، وبينافسه في ده منتجع “سهل حشيش”.

الجونة

تروح إزاي؟

لو أنت رايح بالعربية هنبدأ معاك الرحلة من الدائري، بعد كارفور المعادي بشوية هتلاقي دخلة يمين مكتوب عليها طريق السخنة، هتفضل ماشي فيه على طول لحد ما توصل البوابات (الكارتة بـ 10 جنيه) وفي نص الطريق هتعدي على بورتو السخنة ممكن تقف فيها ريست شوية وبعدين تكمل طريقك، بعدها ريست الزعفرانة ويليها رأس غارب، وفي الآخر هتلاقي بوابات الغردقة، بعدها بـ 3 أو 4 كيلو مدخل الجونة على الشمال.

من القاهرة للجونة 470 كم يعني الطريق ياخد حوالى 4 ساعات ونص بالعربية (لو ماشي على 100 كم/ ساعة)، السرعة القصوى 110، فلو الطريق كان مغري لك وجريت بالعربية الرادار هيجيبك وهتدفع غرامة في نص الطريق 150 جنيه، فطريق السلامة أحسن، الأجازة مش مستاهلة نكد.

لو رايح بالأتوبيس سعر التذكرة بيختلف على حسب أنت هتسافر الصبح ولا بالليل فلازم تسأل قبلها، وبتركبه من التحرير أو ألماظة، بس عيبه أنه مش بيوصلك لحد الفندق، آخره المدخل الرئيسي للجونة بس، أما بالطيارة (سعر التذكرة متغير طبعًا) بتنزل في مطار الغردقة وبتركب تاكسي أو لو حاجز عربية خاصة بياخد الطريق نص ساعة لأن المسافة من مطار الغردقة الدولى للجونة 22 كم.

جولة فى الجونة

الجونة فيها مجموعة فنادق قريبة نسبيًا من بعض، وممكن تأجر شقق أو فيلات لو مش بتحب قعدة الفنادق أو عددكم كبير، أحلى حاجة بقى لو أنت نازل في فندق أنك ممكن تروح أي فندق تاني وتدخله وتشوفه من خلال التمشية على الميناء وتتفرج كمان على يخوت أشكال وألوان في المرسى، بس خلى بالك فيه بعض الفنادق للـ Adults only وبالتالى ممنوع تواجد الأطفال فيها، فتأكد قبل الحجز من النقطة دى.

الجونة مدينة متكاملة، فيه هناك مدرسة EGIS، ومستشفى متكاملة التجهيز، ومكتبة عامة اسمها “سفارة المعرفة”، ودي مكتبة رقمية متطورة بترتبط بشكل رئيسي بمكتبة الإسكندرية، ده غير أن الجونة بيقام فيها إيفنتات كتيرة جدًا زي الماراثون، وبطولة السكواش اللي هتقام في أبريل الجاي، وبقى موضة أن يقام فيها أفراح ومناسبات زي آخر حدث كان فرح حسن الرداد وإيمي سمير غانم.

المطاعم والكافيهات هناك كتيرة جدًا في كل فندق ونسبة كبيرة منها على الميناء، لكن أسعارها سياحية شوية، فلو عاوز تاكل أكلة حلوة وسعرها معقول روح على الداون تاون (وسط البلد) وهتلاقي هناك مطاعم كتيرة بتقدم أكل لبناني ويوناني وتركي ومصري وإيطالي كمان، ومافيش ولا خدمة ولا ضريبة مضافة، وكفر الجونة كمان (جنب الداون تاون) فيه مطاعم تانية مختلفة، والأتنين فيهم محلات بتبيع لبس وإكسسوارات وهدايا تذكارية هاند ميد.

السوبر ماركت متاح فيه كل حاجة سواء عند الفنادق أو في الداون تاون من الساعة 9 صباحًا لحد 12 بالليل، وفيه كمان صيدليات، عامة الدنيا هناك سهلة جدًا لأن مافيش أكتر من اليفط والعلامات الإرشادية اللي هتوصلك مكان ما أنت عاوز.

خروجات القاهرة

أنشطة ممكن تعملها

أكتر حاجة الجونة مشهورة بها هي رياضة الـ Kite Surfing، اللي مخصص لها مكان هناك، وبيقام لها بطولات كمان، للأسف ما جاتش فرصة نعرف تفاصيل عن الأسعار أو شروط الانضمام ولو فيه تدريب ولا لأ، لكن مجرد الفرجة عليها متعة.

كمان ممكن تعمل Diving وSnorkeling وفيه ملاعب جولف، وتقوى عضلات أيدك في رياضة البدال الواقف Stand Up Paddling أو سفارى أو Parasailing أو تستمتع بجمال أعماق البحار فى رحلة الـ Glass Boat أو تركب خيل وغيرها من أنشطة كتير، ودي بيتم حجزها من خلال مكتب الأنشطة اللي موجود في الفندق أو المكاتب المنتشرة في الداون تاون.

خروجات القاهرة

وسائل المواصلات

التوك توك هو وسيلة المواصلات الأولى في الجونة، بس ده مش أي توك توك، شكله وألوانه الصراحة تفتح النفس والسواقين مؤدبين وتسعيرة التوصيل ثابتة 7 جنيه لأي مكان، ده غير أن فيه تاكسي أو ليموزين ممكن تحجزه مقدمًا خاصة لو أنت جاي من المطار، وكمان فيه أتوبيسات مجانية بيوفرها بعض الفنادق بتوصلك لأماكن معينة بيعلن عنها في الريسبشن.

خروجات القاهرة

احجز إزاي؟

مركز الجونة للمعلومات El Gouna information center موجود ومتاح في تمر حنة في الداون تاون يوميًا من 9 صباحًا لـ 11 مساءً لو عاوز تستفسر عن أي حاجة.

حجز الفنادق كلها من خلال الخط الساخن للجونة 16444، لو ما لاقيتش حجز خاصة لو وقت الـ Red Season ممكن تسيب رقم تليفونك لهم علشان لو حد لغى الحجز بتاعه يكلموك، وممكن كمان تحجز من خلال رقم الفندق المباشر أو من خلال موقع الجونة الإلكترونى اللي هتلاقوا عليه أوفرات كل شوية، زي مثلًا أوفر كان لفترة أنك تاخد 3 أيام والرابع مجانًا، وتوقع لو حابب تروح الشهر الجاي (أبريل) ممكن الأسعار تبقى عالية علشان بطولة السكواش.

أجازة سعيدة!

مشاركتك بالتعليق تعنى أنك قرأت بروتوكول نشر التعليقات على دليل المقطم، وأنك تتحمل المسئولية الأدبية والقانونية عن نشر هذا التعليق

بروتوكول نشر التعليقات من دليل المقطم