بالتفاصيل: كل اللي محتاج تعرفه عن أهم أماكن تعليم الطبخ في القاهرة

 

من وإحنا صغيرين -خاصة البنات- كان دخول المطبخ مع ماما علشان نلعب بالدقيق أو نساعدها في تزيين البيتي فور أو نشكل حاجات بأيدينا من أمتع اللحظات اللي اتحفرت في ذاكرتنا، لكن لما بنكبر بعضنا بيقل اهتمامه بالطبخ والمطبخ في حين أنه بيكون شغف عند ناس تانية، لدرجة أنهم بيبقوا عاوزين يتعلموا الوصفات بشكل صح أو احترافي “زي ما قال الكتاب”، وللسبب ده فيه أماكن كتيرة جدًا في القاهرة وفرت كورسات لتعليم الطبخ للكبار والصغيرين، وبتختلف من وصفات أطباق رئيسية لحد الحلويات والمخبوزات، علشان كده حبينا نجمع لكم بعض الأماكن الممتازة في المجال ده: 

مركز تدريب فنون الطهى

الفكرة بدأت في أكتوبر 2011، وده أكبر مركز فيه دراسة شاملة لفنون الطهي ولأساسيات ومبادئ أقسام المطبخ (الحلو والحادق، السخن والبارد، وقسم الحلواني والمخبوزات الشرقية والغربية) والمركز معتمد دوليًا من المؤسسة الإنجليزية سيتي أند جلد.

الدراسة في المركز لها نظامين: دوام كلي، ودوام جزئي، وقيمة الدورات على حسب السن متقسمة فئات: الفئة الأولى من 18: 30 سنة بـ 4000 جنيه، الفئة التانية من 30: 35 سنة بـ 5000 جنيه، والفئة التالتة من 35 سنة فيما فوق بـ 15 ألف جنيه، المصروفات بتشمل قيمة الزي الرسمي وقيمة الانتقالات.

Culinary Center أو مركز تدريب فنون الطهي في المنطقة الصناعية الرابعة، أكاديمية أخبار اليوم فى مدينة 6 أكتوبر.

Lulu’s Kitchen

مؤسسته هي عاليا العسقلاني، عاليا كانت شغالة في مجال العلاقات العامة والعقارات والتسويق وسابت كل ده وسافرت لندن في 2014 ودرست الطبخ بشكل احترافي.

الكورسات في Lulu’s Kitchen مش بس قايمة على مكونات الطبخ، لكن كمان بتعلم تكنيك وتفاصيل، الكورسات بتتعمل في مطبخ عاليا علشان المتدربين يحسوا بالراحة وهما شغالين، ده غير أنها بتقعد معاهم بعد ما يخلصوا الوصفات ياكلوها ويقضوا وقت ممتع، ممكن تتصل بـ 01020010005 علشان تعرف الكورس الجاي إمتى أو زور صفحة الفيسبوك.

الكورس اللي شغال دلوقت عن البيتزا والعيش الإيطالى لمدة 3 ساعات بـ 500 جنيه ومكانه المرة دي مش في بيت عاليا، هيتعمل في مركز “منى بيتى” اللي هنقول لكم تفاصيله في الفقرة الجاية.

منى بيتي – Monappetit

مؤسستها هي منى البنا، منى بيتي كان بدايته فيديوهات لوصفات على اليوتيوب وبعدين تطور بقى كورسات تعليم طبخ، ده غير أنهم اشتغلوا مع ماركات مشهورة زي ريتش بيك، وأكتيفيا وغيرهم.

ستات البيوت، أو الهواة، أو حتى الشيفات المحترفة، كل واحد له كورسات مناسبة له في منى بيتي، وكمان مجالها واسع جدًا ومتنوعة من أول وصفات المطبخ العالمي أو المتخصص (إيطالي، لبناني، صيني، إلخ)، والحلويات، لحد المخبوزات اللي بيقدمها أحسن شيفات في المجال منهم شيفات قناة cbc سفرة شيف وسام مسعود وأميرة شنب، حتى منى البنا بتقدم كورسات بنفسها، ده غير أنهم بيوفروا كورسات للـ Food Styling والـ Food Photography وكمان مطبخهم متاح لاستضافة إيفنتات أو جلسات تصوير أو كورسات تانية.

لو عاوز تستفسر عن مواعيد الكورسات وأسعارها اتصل بـ 01020010005، منى بيتي موجود في مدينة 6 أكتوبر قريب من الحي المتميز.

The House of Cooking – بيت الطهى

شغالين من 2009 وموجودين في مدينة نصر، ومن ساعتها وهما من أحسن أماكن تعليم الطبخ، هما مدرسة تعليم طبخ وبيعملوا كاترينج كمان، هتتعلم معاهم أكلات من بلاد مختلفة، والحلويات، وإزاى تعمل باستا من الصفر، والأكلات المصرية ده غير أن فيه كورسات للأطفال، ممكن تعرفوا نوع الكورسات اللي بيقدموها وأسعارها من الموقع الإلكترونى بتاعهم.

Ruffles House

أول مرة رحنا لهم كانت في رمضان وجربنا من عندهم حلويات فى برطمانات في منتهى الجمال وكتبنا عنها مقال نقدي، هما متخصصين في الكب كيك والكيك والـ Jars، وبيعملوا كاترينج لأعياد الميلاد والأفراح، لهم محلين في الشيخ زايد: الأول في بيفرلي هيلز وده اللي فيه كمان مركز التدريب، والتاني في كيرف مول – Curve Mall.

رافلز هاوس هما المكان الوحيد في مصر اللى بيقدموا كورسات في تزيين الكب كيك والكيك معتمدة من شركة أمريكية اسمها ويلتون – Wilton ومؤسسته مدام دينا سعدة.

شهادة ويلتون عبارة عن 3 مستويات وكلها عن التزيين بس (مافيش Baking) وكل مستوى 4 أيام، وكل كورس هما بيوفروا لك أدوات التزيين والشهادة إلى جانب كتاب ويلتون اللي فيه كل تفاصيل الكورس باستفاضة، والكورس ده بداية من سن 13 سنة، لازم تحجزوا من بدري علشان الحد الأقصى لعدد الأفراد 8 علشان المشتركين يستفيدوا بشكل أفضل.

عندهم كمان كورسات عادية (مش معتمدة من ويلتون) للـ Baking أو الخَبز وعمل الـ Frosting، وفيه كمان Cake Pops وكوكيز، وWedding Cakes وطريقة عمل الـ Macarons وبرطمانات الحلويات، وفيه كمان كورسات مخبوزات حادقة وعيش، والشهر الجاي هيعملوا كورسات مناقيش سوري، وحلويات سورية بيعلم فيها شيف سوري. 

لو عاوز تعرف معلومات عن الأسعار والمواعيد اتصل بمركز التدريب 01019142440.

 

Ganache chocolate

موجودين في دجلة المعادي، جاناش Ganache ماركة الشوكولاتة الفرنسية بيقدموا كورسات لكل الأعمار في صناعة الشوكولاتة يوميًا، أحلى حاجة في كورساتهم أنك أنت اللى بتحدد الميعاد المناسب لك وطبعًا لهم، وممكن كمان تاخد الكورس لوحدك مش لازم مجموعة أو عدد معين، سعر الكورس 125 أو 150 على حسب كمية الشوكولاتة المستخدمة.

جاناش شغالين كل أيام الأسبوع من الساعة 11 لحد الساعة 9 مساءً، ممكن تتصل بـ 01116100010.

Eatery

المطعم الجامد جدًا في كايرو فيستيفال سيتى، إلى جانب أطباقه المميزة، بيقدم كورسات طبخ للكبار والصغيرين، وفيه كورسات بتتعمل علشان مناسبات معينة زي عيد الأم، وشم النسيم، فى شهر أبريل الحالي مافيش كورسات، بس ممكن تتابعهم على الفيسبوك في شهر مايو علشان تعرف الكورسات اللي هينزلوا تفاصيلها على الصفحة، أو ممكن تتصل بالمطعم 01225522300.

مشاركتك بالتعليق تعنى أنك قرأت بروتوكول نشر التعليقات على دليل المقطم، وأنك تتحمل المسئولية الأدبية والقانونية عن نشر هذا التعليق

بروتوكول نشر التعليقات من دليل المقطم